कोरोनाच्या पार्श्वभूमीवर उपाययोजना व उद्भवलेल्या प्रश्नांसंदर्भात आ.पाटणींनी घेतला प्रशासनाकडून आढावा
कारंजा लाड ( कारंजा हुंकार ) : कोरोना विषाणूंचा प्रादुर्भाव रोखण्यासाठी मतदार संघात केलेल्या उपाययोजना तसेच या परिस्थितीत उद्भवलेले प्रश्न यासंदर्भात आमदार पाटणी यांनी २० एप्रिल रोजी स्थानिक विश्रामगृहात संबंधित अधिकार्‍यांची बैठक बोलावून त्या जाणून घेतल्यात.
यावेळी सर्व विभाग प्रमुखांनी केलेल्या उपाययोजना तसेच परिस्थितीत उद्भवलेले प्रश्न आमदार पाटणी यांच्या समोर मांडलेत. यावर संबंधित सर्व विभागांनी समन्वयाने काम करून मतदार संघातच नव्हे तर जिल्ह्यात कोरोनाचा प्रादुर्भाव होता कामा नये त्या दृष्टिने काम करण्याचे सूचना केल्यात.
प्रशासनाच्या उपाययोजना व विभाग प्रमुखांच्या समस्येवर आमदार पाटणी यांची भुमिका.
आरोग्य विभाग: खबरदारीचा उपाय म्हणून उपजिल्हा रूग्णालयात ५० खाटांचे प्रतिबंध व नियंत्रण कक्ष स्थापन करण्यात आले आहे. याशिवाय पुरेसा औषधसाठा व वैद्यकीय सामग्री सांगत असतांना अधीक्षकांनी ५० खाटांवरील जुन्या गाद्या व पीपीई किट संदर्भात आमदार महोदयांचे लक्ष वेधले. यावेळी आ.पाटणी यांनी जिल्हाधिकारी यांना फोन करून माहिती दिली, ज्यावर जिल्हाधिकारी, वाशिम यांनी तातडीने दखल घेत येत्या एक-दोन दिवसात उपलब्ध करून देणार असल्याचे सांगितले. तर दुसरीकडे कारंजा व मानोरा येथील अपुर्‍या पीपीई किट संदर्भात जिल्हा शल्यचिकित्सक यांनी सुध्दा आजरात्रीपर्यंत संबंधित रूग्णालयास पोहचविणार असल्याचे सांगितले.
महसुल विभाग: तहसीलदार मांजरे यांनी राशन पुरवठा, मोफत अन्नधान्य, जीवनावश्यक वस्तू व अत्यावश्यक सेवेशी निगडीत पासेस याशिवाय प्रत्येक राशन दुकानावर दोन शिक्षकांच्या करण्यात आलेल्या नियुक्त्या संबंधी माहिती दिली. यावेळी ज्या राशन धारकांनी काळाबाजार किंवा अफरातफर केली अशांवर कडक कारवाई करण्याच्या सुचना त्यांनी यावेळी जिल्हा पुरवठा अधिकार्‍यांना केल्यात.
पोलिस प्रशासन: संचारबंदी काळात उपविभागीय पोलिस अधिकारी पाटील यांनी वाहन तसेच अवैध दारूविक्री संबंधी केलेली दंडात्मक कारवाई, अत्यावश्यक सेवेत दुकानदार व नागरिकांना जागृत व उपाययोजनांबाबत माहिती दिली. जिल्हा सिमेवर तैनात पोलिस कर्मचार्‍यांना पीपीई किट व सॅनिटायझरचा पुरेसा साठा नसल्याबाबत आ.पाटणी यांना अवगत करतांच त्यांनी संबंधित कर्मचार्‍यांची माहिती देऊन त्यांना आपण स्वत: लवकरच उपलब्ध करून देऊ असे आश्वासन दिले. मुख्य रस्त्यांशिवाय ग्रामीण रस्त्यांच्या ज्या इतर जिल्ह्याच्या संबंधित आहेत अशा सीमा सुध्दा सिल करण्याच्या तसेच वृध्द, महिला, आजारी व्यक्ती यांच्यावर बळाचा वापर न करण्याच्या सूचना त्यांनी यावेळी पोलिस प्रशासनला केल्यात.
नगर परिषद प्रशासन: मुख्याधिकारी तसेच तहसीलदार यांनी संभाव्य परिस्थिती लक्षात घेता अडकलेले प्रवासी, बेघर नागरिक व मजूर यांची दक्षता घेऊन त्यांच्या निवास व भोजनाची व्यवस्था करण्याच्या सूचना त्यांनी यावेळी केल्या
पाणी पुरवठा: मानोरा येथील पाईपलाईन दुरूस्तीचे काम सुरू असल्यामुळे टँकरव्दारे पाणी पुरवठा करण्यात यावा यासाठी आमदार पाटणी यांनी केलेली मागणी जिल्हाधिकारी यांनी तातडीने मान्य केली आहे. त्यामुळे लवकरच मानोरा येथे टँकरव्दारे सुरळीत पाणी पुरवठा होईल यांनी यानिमित्त त्यांनी मानोरावासीयांना आश्वस्त केले.
आयोजित बैठकीला तहसीलदार मांजरे, मुख्याधिकारी डॉ.कुरवाडे, गटविकास अधिकारी तापी, उपजिल्हा रूग्णालयाचे डॉ.तपासे, तालुका आरोग्य अधिकारी डॉ.किरण जाधव, उपविभागीय पोलिस अधिकारी पाटील, ठाणेदार सतीश पाटील, ठाणेदार जाधव, सा.बां.विभागाचे मेश्राम याशिवाय संबंधित अधिकारी व कर्मचारी तसेच भाजपा तालुकाध्यक्ष डॉ.राजीव काळे, शहराध्यक्ष ललित चांडक आदींची प्र्रामुख्याने उपस्थिती लाभली होती.
तातडीने केलेल्या उपाययोजना:
* उपजिल्हा रूग्णालयातील ५० खाटांवर तातडीने नवीन गाद्या, १०० चादरी व पिलो कव्हर * कारंजा व मानोरा येथील उपजिल्हा रूग्णालयसह ग्रामीण व प्राथमिक आरोग्य केंद्रांना तातडीने पीपीई किट देण्याचे निर्देश * जिल्हा सिमेवरील तैनात पोलिसांना आ.पाटणी यांचेकडून सॅनिटायझर, पीपीई किट * मानोरा येथे तातडीने टँकरव्दारे पाणी पुरवठा करण्याचे निर्देश * जिल्हासिमेसह इतर जिल्ह्यांना जोडणार्‍या ग्रामीण सिमा सिल करण्याचे निर्देश * बेघर व स्थलांतरीत मजुरांना निवासी व भोजनाची व्यवस्था करण्याचे तहसीलदार व मुख्याधिकारी यांना निर्देश * काळाबाजार करणार्‍या राशन दुकानदारांचे परवाने रद्द करण्याचे जिल्हा पुरवठा अधिकार्‍यांना सुचना
